Ысык-Көл облусунда информатика мугалимдерин окутуу семинары

Кыргыз Республикасынын Санариптик өнүктүрүү министрлигине караштуу “Инфоком” Мамлекеттик ишканасы Билим берүү жана илим министрлиги менен биргеликте санариптик сабаттуулуктун деңгээлин жогорулатуу максатында №101 максаттуу мектебинде информатика мугалимдери үчүн окутуу семинарын өткөрдү.

Семинарда КР Санариптик өнүктүрүү министрлигинин алдындагы “Инфоком” МИнин адистери маанилүү темалар, анын ичинде Түндүк тиркемеси аркылуу электрондук мамлекеттик кызмат көрсөтүүлөр, Булуттагы электрондук кол тамганы пайдалануу, маалыматтык коопсуздуктун негиздери жана санариптик гигиена боюнча докладдар менен чыгып сүйлөштү. Иш-чаранын катышуучулары санариптик ресурстарды натыйжалуу пайдаланууга жана маалыматтын коопсуздугун камсыз кылууга жардам бере турган баалуу билимдерге ээ болушту.

Семинардын негизги максаттары төмөнкүлөрдү камтыйт:
• Булуттук электрондук кол тамгасын пайдалануунун маанилүүлүгүн жана аны алуу ыкмаларын чагылдыруу.
• Мугалимдерди, жогорку класстардын окуучуларын жана алардын ата-энелерин Түндүк мобилдик тиркемеси аркылуу маалымкаттарды жана кызматтарды алыстан алуу мүмкүнчүлүктөрү менен тааныштыруу, бул Калкты тейлөө борборлоруна (КТБ) баруу зарылчылыгынан арылууга мүмкүндүк берет.
• КР Билим берүү жана илим министрлигинин мамлекеттик маалымат системаларында сакталган жеке маалыматтардын чыгып кетүү коркунучун азайтуу максатында мугалимдер арасында маалыматтык коопсуздук жана санариптик гигиена принциптери жөнүндө маалымдуулукту жогорулатуу.

Семинар санариптик сабаттуулукту жана билим берүү процессиндеги коопсуздукту жогорулатуудагы маанилүү кадам болуп, өлкөнүн билим берүү системасына заманбап технологияларды натыйжалуу киргизүүгө өбөлгө түздү.