Кыргызстан КОП29до өз павильонунда инновациялык долбоорлорун сунуштады

2024-жылдын 14-ноябрынан 22-ноябрына чейин Бакуда Климаттын өзгөрүшү боюнча БУУнун Конвенциясына катышкан тараптардын 29-конференциясы (КОП29) өтүүдө. Климаттын өзгөрүшүнө арналган EXPO көргөзмөсүндө Кыргыз Республикасы туруктуу өнүгүү жана экосистемаларды коргоого багытталган санарип жана экологиялык долбоорлор менен улуттук павильонун уюштурду.

Санариптик өнүктүрүү министри Нурия Кутнаева түз эфирде чыгып сүйлөп, төмөнкүлөрдү баса белгиледи:

“Санариптик чечимдер климаттын өзгөрүшүнө каршы күрөшүүдө маанилүү роль ойнойт. Кыргызстан көмүр кычкыл газынын азайышына жана экономиканын туруктуулугуна жетишүү үчүн инновацияларды активдүү киргизүүдө.”

Панелдик талкуулар жана стартаптардын катышуусу

Кыргызстандын павильонунда климаттык чакырыктарды чечүүдө илимдин жана санариптик технологиялардын ролун талкуулоо боюнча панелдик талкуулар өттү. Бул иш-чарага министрликтердин өкүлдөрү, эл аралык эксперттер жана стартаптар катышып, өздөрүнүн иштеп чыгуулары менен бөлүштү.

eWorldwide Group компаниясынын төрайымы жана башкы директору, профессор Салма Аббаси төмөнкүлөрдү белгиледи:

“Дүйнөнүн климатын жакшыртуу үчүн ар бир өлкөнүн жарандары бул процесстерге активдүү катышуусу маанилүү.”

Кыргызстандын Улуттук илимдер академиясынын профессору Аскар Тогорбаев климаттык шарттарды көзөмөлдөө үчүн заманбап технологиялар жана автоматташтырылган системаларды киргизүү зарылдыгы тууралуу айтты. Ошондой эле ал өлкөнүн суу ресурстарын жана экосистемаларын сактоо үчүн жасалма мөңгүлөрдү түзүү маанилүүлүгүн баса белгиледи.

“Инфоком” мамлекеттик ишканасынын директорунун орун басары жана КР Санариптик өнүктүрүү министрлигинин өкүлү Даниэль Эшматов “Infodocs” электрондук документ жүгүртүү долбоорун сунуштады. Анын айтымында, бул системаны киргизүү кагаз колдонууга керектүү муктаждыкты азайтып, бактарды сактоого, экосистемага оң таасир берет.

Кыргызстандын долбоорлору менен эл аралык катышуучулардын таанышуусу

КОП29дун эл аралык коноктору Кыргызстандын сунушталган долбоорлору менен таанышып, туруктуу өнүгүү үчүн санариптик чечимдерге арналган панелдик талкууларга катыша алышты. Кыргызстандын жаш стартаптары, мисалы “Калил Индастр” компаниясы, алыскы аймактарда автономдук энергия менен камсыздоо үчүн экологиялык павербанк “Агым” сыяктуу инновациялык чечимдерди сунушташты.

КОП29 платформасынын туруктуу өнүгүү максаттарына жетишүүдөгү мааниси

Кыргызстан климаттык саясат боюнча тажрыйба алмашуу жана эл аралык кызматташтыкты бекемдөө үчүн КОП29 платформасын активдүү колдонууда. Сунушталган долбоорлор жана идеялар өлкөнүн Туруктуу өнүгүү максаттарына (ТӨМ) жана экологиялык абалды улуттук жана глобалдык деңгээлде жакшыртууга болгон умтулушун баса белгилейт.