Кыргызстан менен Кытай логистика жана чек ара соодасын өнүктүрүүдө кызматташтыкты бекемдөөдө

2024-жылдын 20-ноябрында Кытайга болгон кыргыз делегациясынын иш сапарынын алкагында «Кыргыз почтасы» ачык акционердик коомунун жетекчилиги Янтянь Эл аралык контейнер терминалынын президенти Шен мырза менен жолугушуу өткөрдү. Жолугушуу Кашгар шаарында болуп, эки өлкөнүн транспорттук-логистикалык инфраструктурасын өнүктүрүү жана соода байланыштарын бекемдөө маселелерине арналды.

Жолугушууда негизги көңүл Кытай, Кыргызстан жана Өзбекстанды байланыштырган логистикалык маршруттарды жакшыртууга, ошондой эле Борбордук Азияны, Европаны жана башка аймактарды туташтырган жаңы транспорттук коридорлорду түзүүгө бурулду. Кыргызстан аймагында инфратүзүмдү өнүктүрүү, иштеп жаткан объектилерди модернизациялоо жана жаңы транспорттук түйүндөрдү куруу маселеси өзгөчө талкууланып, бул чаралар жүктөрдү ташууну натыйжалуу жүргүзүүгө шарт түзөрү белгиленди.

Шэньчжэнь шаарында жайгашкан Янтянь Эл аралык контейнер терминалы глобалдык соода системасынын маанилүү бөлүгү болуп саналат жана Борбордук Азиядан эл аралык рынокторго товар экспорттоо үчүн негизги звено болуп эсептелет. Жолугушууда Янтянь порту аркылуу кыргызстандык жана региондогу башка өлкөлөрдүн товарларын ЕАЭБ, Борбордук Азия, Европа жана Жакынкы Чыгышты туташтырган стратегиялык транспорттук маршруттар менен экспорттоо мүмкүнчүлүктөрү талкууланды.

Кыргызстан менен Кытайдын логистика жана соода тармагындагы кызматташтыгы активдүү өнүгүүдө. Кытай өлкөсү соода байланыштарын бекемдөө, заманбап транспорттук коридорлорду түзүү жана Борбордук Азияны эл аралык жеткирүү чынжырларына интеграциялоо боюнча маанилүү өнөктөш болуп калууда.