Вернуться к списку новостей

КР МТБМК төрагасы Д. Догоев жана КР Президентине караштуу Мамлекеттик тил боюнча улуттук комиссиясынын төрагасы Н.Ишекеев мамлекеттик тил маселеси жөнүндө маектешти

2019ж., 29-август

Жолугушуу  КР Президенти Сооронбай Жээнбековдун 2019-жылды «Аймактарды өнүктүрүү жана өлкөнү санариптештирүү жылы деп жарыялоо жөнүндө»  Жарлыгынын алкагында жана «Кыргыз Республикасынын мамлекеттик тили жөнүндө» Кыргыз Республикасынын Мыйзамынын кабыл алынгандыгынын 30 жылдыгына арналган иш-чараларды жүзөгө ашыруу  максатында өткөрүлдү.

Аталган жолугушууда Мамлекеттик тил боюнча улуттук комиссиянын төрагасы Н. Ишекеев  өлкөнү санариптештирүүгө өткөрүүдөгү мамлекеттик тилдин ролу туурасында, жалпы эле санариптештирүү доорундагы мамлеттик тил жаатындагы актуалдуу маселелер тууралуу сөз кылды. Өз сөзүндө мамлекетти өнүктүрүүдө негизги тил мамлекеттик тил болушу мезгилдин талабы экендигин белгиледи. Өлкөдөгү санариптик трансформациялоо доорунда мамлекеттик тилдин санариптештирүүгө  катыштуу стратегиясын  иштеп чыгуу сунушун киргизди.

Тил – коргонуу каражаты катары,  тилди мамлекетти коргоо каражаты катары механизмдерин санариптештирүү аркылуу иштеп чыгуу сунушун ортого салды.  

Ошону менен бирге, жаңы иштелип чыгып жаткан маалыматтык системаларды, мамлекеттик органдардын жана жергиликтүү өз алдынча башкаруу органдарынын расмий сайттарын иштеп чыгууда мамлекеттик тилге басым жасоо керектиги айтылды.

Ал эми  Комитеттин  төрагасы Д. Догоев Мамлекеттик тил боюнча улуттук комиссиясынын сунуштары эске алынгандыгын,  маалыматтык системаларды иштеп чыгууда,  аларды которууда, ошондой эле Түндүк системасына кошулууда, жалпы эле бардык багытта электрондук форматта маалымат алмашууда мамлекеттик тилди негизги тил катары пайдалануу тапшырмасы берилгендигин билдирди.   

Өз кезегинде Комитеттин  төрагасы Д.Догоев мамлекеттик тилдеги терминдер,  жер-суу аталыштары, ж.б. боюнча  бирдиктүү стандарттарды иштеп чыгуу керектигин айтты.

Д.Догоев маалыматтык технологиялар жана байланыш  жаатында пайдаланылган жалпы терминдерди бирдейлештирүү максатында  бирдиктүү  платформа түзүп онлайн-сөздүк иштеп чыгуу демилгесин ортого салды. Бул онлайн-сөздүктү түзүүдө буга чейин маалыматтык технологиялар жаатындагы терминдерди которуу аракетин көрүп келген  мамлекеттик органдар, жогорку окуу жайлардагы окутуучулар, жеке котормочулар, жарандар жана Кыргыз Республикасынын Өкмөтүнө караштуу Терминологиялык комитети бирге иш алып бара тургандыгы жана ал мамлекеттик ачык платформа боло тургандыгын билдирди. Бул идея  тарыхый маанидеги  алгылыктуу иш боло тургандыгы бир добуштан колдоого алынды. Жолугушуунун аягында эки мамлекеттик органдын ортосундагы  кызматташуу боюнча дагы  жолугушуулар, жыйындар өткөрүлө тургандыгы, алдыда биргелешип иш алып бара турган маселелер бар экендиги тууралуу айтылды.  

Вернуться к списку новостей